Die 22 iulii
S. MARIÆ MAGDALENÆ
Memoria
De Communi sanctarum mulierum, præter sequentia:
Hymnus
De Communi SMul. Ad Officium lectionis
Lectio altera
Ex Homilíis sancti Gregórii Magni papæ in Evangélia (Hom. 25, 1-2. 4-5: PL 76, 1189-1193)
Christi, quem ablatum credidit, ardebat desiderio
Dicit ei Iesus: María. Postquam eam commúni vocábulo appellávit ex sexu, et ágnitus non est, vocat ex nómine. Ac si ei apérte dicat: «Recognósce eum, a quo recognósceris. Non te generáliter ut céteros, sed speciáliter scio». María ergo, quia vocátur ex nómine, recognóscit auctórem, atque eum prótinus «rabbóni», id est «magístrum» vocat, quia et ipse erat qui quærebátur extérius, et ipse qui eam intérius ut quæreret docébat.
Responsorium
R/. Rédiens a monuménto Dómini, María Magdaléna nuntiávit discípulis: Quia vidi Dóminum. * Beáta quæ digna fuit vitæ resurgéntis primum ferre núntium.
V/. Diu diléctum flens quæsítum vidit, visum nuntiávit. * Beáta.
Oratio
Deus, cuius Unigénitus Maríæ Magdalénæ ante omnes gáudium nuntiándum paschále commísit, præsta, quæsumus, ut, eius intercessióne et exémplo, Christum vivéntem prædicémus, et in glória tua regnántem videámus. Qui tecum vivit.
Hymnus
Auróra surgit lúcida
Christi triúmphos áfferens,
cum corpus eius vísere,
María, vis et úngere.
Anhéla curris; ángelus
at ecce lætus prædocet
mortis refráctis póstibus
redísse quem desíderas.
Sed te manet iucúndius
intácti amóris præmium,
cum, voce pulsans vílicum,
tuum Magístrum cónspicis.
Quæ cum dolénti Vírgine
hæsísti acérbo stípiti,
tu prima vivi ab ínferis
es testis atque núntia.
O flos venúste Mágdalæ,
o Christi amóre sáucia,
tu caritátis ígnibus
fac nostra corda férveant.
Da, Christe, tantæ sérvulæ
dilectiónem pérsequi,
et nos tu in cæléstibus
tibi canámus glóriam. Amen.
Ant. 1 Una sábbati, María Magdaléne venit mane, cum adhuc ténebræ essent, ad monuméntum.
Psalmus de dominica hebd. I.
Ant. 2 Ardens est cor meum: desídero vidére Dóminum meum; quæro, et non invénio ubi posuérunt eum, allelúia.
Canticum de dominica hebd. I.
Ant. 3 Dum fleret María, inclinávit se et prospéxit in monuméntum; et vidit duos ángelos in albis sedéntes, allelúia.
Psalmus de dominica hebd. I.
Lectio brevis Rom 12, 1-2
Obsecro vos, fratres, per misericórdiam Dei, ut exhibeátis córpora vestra hóstiam vivéntem, sanctam, Deo placéntem, rationábile obséquium vestrum; et nolíte conformári huic sæculo, sed transformámini renovatióne mentis, ut probétis quid sit volúntas Dei, quid bonum et bene placens et perféctum.
Responsorium breve
R/. María, noli iam flere, * Surréxit Dóminus a mórtuis. María.
V/. Vade ad fratres meos, et dic eis: * Surréxit Dóminus a mórtuis. Glória Patri. María.
Ad Benedictus, ant. Surgens Iesus mane prima sábbati, appáruit primo Maríæ Magdalénæ, de qua eiécerat septem dæmónia.
Preces de Communi sanctarum mulierum, vel de feria.
Oratio
Deus, cuius Unigénitus Maríæ Magdalénæ ante omnes gáudium nuntiándum paschále commísit, præsta, quæsumus, ut, eius intercessióne et exémplo, Christum vivéntem prædicémus, et in glória tua regnántem videámus. Qui tecum vivit.
Hymnus
Ant. 1 Dicit Iesus Maríæ: Múlier, quid ploras? quem quæris?
Psalmodia de Communi sanctarum mulierum.
Ant. 2 Tulérunt Dóminum meum, et néscio ubi posuérunt eum.
Ant. 3 Dicit Iesus: María. Convérsa illa dicit ei: Rabbóni, quod dícitur: Magíster.
Lectio brevis Rom 8, 28-30
Scimus quóniam diligéntibus Deum ómnia cooperántur in bonum, his, qui secúndum propósitum vocáti sunt. Nam, quos præscívit, et prædestinávit confórmes fíeri imáginis Fílii eius, ut sit ipse primogénitus in multis frátribus; quos autem prædestinávit, hos et vocávit; et quos vocávit, hos et iustificávit; quos autem iustificávit, illos et glorificávit.
Responsorium breve
R/. María, noli iam flere, * Surréxit Dóminus a mórtuis. María.
V/. Vade ad fratres meos, et dic eis: * Surréxit Dóminus a mórtuis. Glória Patri. María.
Ad Magnificat, ant. Venit María, núntians discípulis quia vidit Dóminum, allelúia.
Preces de Communi sanctarum mulierum ad Vesperas; vel de feria.
Oratio
Deus, cuius Unigénitus Maríæ Magdalénæ ante omnes gáudium nuntiándum paschále commísit, præsta, quæsumus, ut, eius intercessióne et exémplo, Christum vivéntem prædicémus, et in glória tua regnántem videámus. Qui tecum vivit.
Die 23 iulii
S. BIRGITTÆ, RELIGIOSÆ
Festum
De Communi sanctarum mulierum: pro religiosis.
Ad Officium lectionis
Ex Oratiónibus sanctæ Birgíttæ attribútis (Oratio 2: Revelationum S. Birgittæ libri, 2, Romæ 1628, pp. 408-410)
Elevatio mentis ad Christum salvatorem
Honor sempitérnus sit tibi, mi Dómine Iesu Christe, qui die tértia a mórtuis resurrexísti et, quibus tibi plácuit, te vivéntem manifestásti, post quadragínta quoque dies ad cælos multis vidéntibus ascendísti, ibíque amícos tuos, quos a tártaris liberáveras honorífice collocásti.
Responsorium Ap 1, 5. 6a; Eph 5, 2a
R/. Christus díligit nos et solvit nos a peccátis nostris in sánguine suo; * Et fecit nos regnum, sacerdótes Deo et Patri suo.
V/. Ambuláte in dilectióne, sicut et Christus diléxit nos et trádidit seípsum pro nobis. * Et fecit.
Hymnus Te Deum.
Oratio
Dómine Deus noster, qui beátæ Birgíttæ, Fílii tui passiónem meditánti, secréta cæléstia revelásti, da nobis fámulis tuis in revelatióne glóriæ tuæ gaudére lætántes. Per Dóminum.
Die 25 iulii
S. IACOBI, APOSTOLI
Festum
De Communi Apostolorum, præter sequentia:
De Communi Ap. Ad Officium lectionis
Lectio altera
Ex Homilíis sancti Ioánnis Chrysóstomi epíscopi in Matthæum (Hom. 65, 2-4: PG 58, 619-622)
Responsorium Ps 18 (19), 5
R/. Isti sunt, qui vivéntes in carne, plantavérunt Ecclésiam sánguine suo; * Cálicem Dómini bibérunt et amíci Dei facti sunt.
V/. In omnem terram exívit sonus eórum, et in fines orbis terræ verba eórum. * Cálicem.
Hymnus Te Deum.
Oratio
Omnípotens sempitérne Deus, qui Apostolórum tuórum primítias beáti Iacóbi sánguine dedicásti, da, quæsumus, Ecclésiæ tuæ ipsíus confessióne firmári, et iúgiter patrocíniis confovéri. Per Dóminum.
Hymnus
Ipso vocánte, cóncitus
cum fratre linquis ómnia,
ipsíus et fis nóminis
verbíque præco férvidus.
Iesu fidélis ássecla
satórque lucis cælicæ,
mentes fide claréscere,
da spe fovéri péctora.
Christi sequi da sédulos
præcépta nos in sæculo,
hymnos ut olim glóriæ
fundámus illi pérpetim. Amen.
Ant. 1 Procédens Iesus vidit Iacóbum Zebedæi et Ioánnem fratrem eius, et vocávit eos.
Psalmus de dominica hebd. I.
Ant. 2 Illi autem statim, relíctis rétibus et patre, secúti sunt eum.
Canticum de dominica hebd. I.
Ant. 3 Cálicem quem ego bibo, bibétis, et baptísmo quo ego baptízor, baptizabímini.
Psalmus de dominica hebd. I.
Lectio brevis Eph 2, 19-22
Iam non estis extránei et ádvenæ, sed estis concíves sanctórum et doméstici Dei, superædificáti super fundaméntum apostolórum et prophetárum, ipso summo angulári lápide Christo Iesu, in quo omnis ædificátio compácta crescit in templum sanctum in Dómino, in quo et vos coædificámini in habitáculum Dei in Spíritu.
Responsorium breve
R/. Constítues eos príncipes * Super omnem terram. Constítues.
V/. Mémores erunt nóminis tui, Dómine. * Super omnem terram. Glória Patri. Constítues.
Ad Benedictus, ant. Assúmpsit Iesus Petrum et Iacóbum et Ioánnem fratrem eius, et duxit eos in montem excélsum seórsum, et transfigurátus est ante eos.
Preces De Communi Apostolorum.
Oratio
Omnípotens sempitérne Deus, qui Apostolórum tuórum primítias beáti Iacóbi sánguine dedicásti, da, quæsumus, Ecclésiæ tuæ ipsíus confessióne firmári, et iúgiter patrocíniis confovéri. Per Dóminum.
Hymnus Exsúltet cælum láudibus de Communi Apostolorum.
Ant. 1 Assúmpsit Iesus Petrum et Iacóbum et Ioánnem secum, et cœpit pavére et tædére.
Psalmodia de Communi Apostolorum.
Ant. 2 Tunc ait illis: Vigiláte et oráte, ut non intrétis in tentatiónem.
Ant. 3 Misit Heródes rex manus, ut afflígeret quosdam de Ecclésia. Occídit autem Iacóbum fratrem Ioánnis gládio.
Lectio brevis Eph 4, 11-13
Christus dedit quosdam quidem apóstolos, quosdam autem prophétas, álios vero evangelístas, álios autem pastóres et doctóres ad instructiónem sanctórum in opus ministérii, in ædificatiónem córporis Christi, donec occurrámus omnes in unitátem fídei et agnitiónis Fílii Dei, in virum perféctum, in mensúram ætátis plenitúdinis Christi.
Responsorium breve
R/. Annuntiáte inter gentes * Glóriam Dómini. Annuntiáte.
V/. In ómnibus pópulis mirabília eius. * Glóriam Dómini. Glória Patri. Annuntiáte.
Ad Magnificat, ant. Quicúmque volúerit fíeri maior, erit vester miníster; et quicúmque volúerit in vobis primus esse, erit ómnium servus.
Preces De Communi Apostolorum.
Oratio
Omnípotens sempitérne Deus, qui Apostolórum tuórum primítias beáti Iacóbi sánguine dedicásti, da, quæsumus, Ecclésiæ tuæ ipsíus confessióne firmári, et iúgiter patrocíniis confovéri. Per Dóminum.
Die 26 iulii
SS. IOACHIM ET ANNÆ, PARENTUM BEATÆ MARIÆ VIRGINIS
Memoria
De Communi sanctorum virorum, præter sequentia:
Hymnus
Lectio altera
Ex Sermónibus sancti Ioánnis Damascéni presbýteri (Orat. 6, in Nativitatem B. Mariæ V., 2. 4. 5. 6: PG 96, 663. 667. 670)
Ex fructibus eorum cognoscetis eos
O castíssimum par Ióachim et Anna! Vos castitátem, quam natúræ lex præscríbit, conservántes, ea quæ natúram súperant, divínitus estis consecúti: mundo quippe Dei matrem viri nésciam peperístis. Vos pie et sancte in humána natúra vitam agéntes, fíliam ángelis superiórem nuncque angelórum dóminam edidístis. O speciosíssima dulcissimáque puélla! O fília Adámi et Dei mater! Beáti lumbi et venter, ex quibus prodiísti! Beátæ ulnæ, quæ te gestavérunt; lábia item, quibus castis ósculis frui concéssa es, paréntum nempe dumtáxat tuórum, ut in ómnibus semper virginitátem cóleres! Iubiláte Deo, omnis terra, cantáte, exsultáte et psállite. Exaltáte vocem vestram, exaltáte, nolíte timére.
Responsorium Cf. Lc 2, 37. 38; 7, 16
R/. Ieiúniis et obsecratiónibus Dómino serviébant nocte ac die, * Exspectántes redemptiónem Israel.
V/. Orábant Deum, ut visitáret plebem suam. * Exspectántes.
Oratio
Dómine, Deus patrum nostrórum, qui beátis Ióachim et Annæ hanc grátiam contulísti, ut ex eis incarnáti Fílii tui Mater nascerétur, utriúsque précibus concéde, ut salútem tuo promíssam pópulo consequámur. Per Dóminum.
Hymnus
Nocti succédit lúcifer,
quem mox auróra séquitur,
solis ortum prænúntians
mundum lustrántis lúmine.
Anna, radix ubérrima,
arbor tu salutífera,
virgam prodúcens flóridam
quæ Christum nobis áttulit.
O matris Christi génetrix
tuque parens sanctíssime,
natæ favénte mérito,
nobis rogáte véniam.
Lectio brevis Is 55, 3
Inclináte aurem vestram et veníte ad me; audíte, ut vivat ánima vestra, et fériam vobíscum pactum sempitérnum, misericórdias David fidéles.
Responsorium breve
R/. Per víscera misericórdiæ suæ, * Visitávit nos Dóminus. Per víscera.
V/. Ex sémine David edúxit salvatórem Iesum. * Visitávit nos Dóminus. Glória Patri. Per víscera.
Ad Benedictus, ant. Benedíctus Dóminus Deus Israel, quia eréxit cornu salútis nobis in domo David púeri sui.
Preces de Communi sanctorum virorum, vel de feria.
Oratio
Dómine, Deus patrum nostrórum, qui beátis Ióachim et Annæ hanc grátiam contulísti, ut ex eis incarnáti Fílii tui Mater nascerétur, utriúsque précibus concéde, ut salútem tuo promíssam pópulo consequámur. Per Dóminum.
Hymnus
Lectio brevis Rom 9, 4-5
Sunt Israelítæ, quorum adóptio est filiórum et glória et testaménta et legislátio et cultus et promissiónes, quorum sunt patres, et ex quibus Christus secúndum carnem: qui est super ómnia Deus benedíctus in sæcula. Amen.
Responsorium breve
R/. Suscépit Israel púerum suum, * Recordátus misericórdiæ suæ. Suscépit.
V/. Sicut locútus est ad patres nostros. * Recordátus misericórdiæ suæ. Glória Patri. Suscépit.
Ad Magnificat, ant. Inclita stirps Iesse virgam prodúxit amœnam, de qua procéssit flos miro plenus odóre.
Preces de Communi sanctorum virorum, vel de feria.
Oratio
Dómine, Deus patrum nostrórum, qui beátis Ióachim et Annæ hanc grátiam contulísti, ut ex eis incarnáti Fílii tui Mater nascerétur, utriúsque précibus concéde, ut salútem tuo promíssam pópulo consequámur. Per Dóminum.
Die 29 iulii
S. MARTHÆ
Memoria
De Communi sanctarum mulierum, præter sequentia:
Hymnus
Te gratulántes pángimus,
Martha, beáta múlier,
quæ meruísti sæpius
Christum domi recípere.
Tantum libénter hóspitem
curis ornábas sédulis,
in plúrima sollícita
amóris dulci stímulo.
Pascis dum læta Dóminum,
soror ac frater ávide
possunt ab illo grátiæ
vitæque cibum súmere.
Captúro mortis trámitem
dante soróre arómata,
extrémi tu servítii
vigil donásti múnera.
Magístri felix hóspita,
corda fac nostra férveant,
ut illi gratæ iúgiter
sint sedes amicítiæ.
Sit Trinitáti glória,
quæ nos in domum cælicam
admítti tandem tríbuat
tecúmque laudes cánere. Amen.
De Commune SMul. Ad Officium lectionis
Lectio altera
Ex Sermónibus sancti Augustíni epíscopi (Sermo 103, 1-2. 6: PL 38, 613. 615)
Beati qui Christum suscipere in domum propriam meruerunt
Responsorium Io 12, 3
R/. Postquam Iesus suscitávit Lázarum, fecérunt ei Bethániæ cenam, * Et Martha ministrábat.
V/. María ergo accépit libram unguénti pretiósi et unxit pedes Iesu. * Et Martha ministrábat.
Hymnus
De Communi SMul. Ad Laudes matutinas
Ad Benedictus, ant. Dixit Martha ad Iesum: Tu es Christus, Fílius Dei vivi, qui in hunc mundum venísti.
Preces de Communi sanctarum mulierum.
Hymnus
Te gratulántes pángimus,
Martha, beáta múlier,
quæ meruísti sæpius
Christum domi recípere.
Tantum libénter hóspitem
curis ornábas sédulis,
in plúrima sollícita
amóris dulci stímulo.
Pascis dum læta Dóminum,
soror ac frater ávide
possunt ab illo grátiæ
vitæque cibum súmere.
Captúro mortis trámitem
dante soróre arómata,
extrémi tu servítii
vigil donásti múnera.
Magístri felix hóspita,
corda fac nostra férveant,
ut illi gratæ iúgiter
sint sedes amicítiæ.
Sit Trinitáti glória,
quæ nos in domum cælicam
admítti tandem tríbuat
tecúmque laudes cánere. Amen.
De Communi SMul. Ad II Vesperas
Ad Magnificat, ant. Diligébat Iesus Martham et sorórem eius Maríam et Lázarum fratrem eius.
Preces de Communi sanctarum mulierum
Die 30 iulii
S. PETRI CHRYSOLOGI, EPISCOPI ET ECCLESIÆ DOCTORIS
De Communi pastorum: pro episcopis, et doctorum Ecclesiæ.
Ad Officium lectionis
Ex Sermónibus sancti Petri Chrysólogi epíscopi (Sermo 148: PL 52, 596-598)
Responsorium Cf. 1 Petr 2, 4a. 5a; Ps 117 (118), 22b
R/. Ad Dóminum accedéntes lápidem vivum; * Et ipsi tamquam lápides vivi superædificámini.
V/. Hic est lapis, qui factus est in caput ánguli. * Et ipsi.
Die 31 iulii
S. IGNATII DE LOYOLA, PRESBYTERI
Memoria
De Communi pastorum: pro presbyteris, vel sanctorum virorum: pro religiosis.
Ad Officium lectionis
Ex Actis a Ludovíco Consálvo ex ore sancti Ignátii excéptis (Cap. 1, 5-9: Acta Sanctorum Iulii, 7 [1868], 647)
Probate spiritus si ex Deo sint
Sed in his cogitatiónibus hoc discrímen erat, quod, cum sæculáribus inténderet, magna voluptáte capiebátur; at ubi fessus destitísset, mæstum se atque áridum sentiébat; cum vero de rigóribus sectándis, quibus usos viros sanctos animadvertébat, cogitáret, non tunc solum cum ea ánimo versábat, voluptátem ánimo capiébat, sed ubi deposuísset, lætum se inveniébat. Ipse tamen discrímen hoc nec animadvertébat, nec æstimábat, donec apértis quodam die mentis eius óculis, mirári cœpit discrímen hoc, ipsa rei experiéntia intéllegens, ex uno cogitatiónum génere sibi mæstítiam, ex áltero lætítiam relínqui. Atque hæc prima fuit ratiocinátio, quam de rebus divínis colligábat. Post autem, cum in spiritália exercítia fuísset ingréssus, hinc primum illustrári cœpit ad intellegéndum quod de spirítuum diversitáte suos dócuit.
Responsorium 1 Petr 4, 11. 8a
R/. Si quis lóquitur, quasi sermónes Dei; si quis minístrat, tamquam ex virtúte quam largítur Deus, * Ut in ómnibus honorificétur Deus per Iesum Christum.
V/. Ante ómnia mútuam caritátem contínuam habéntes, * Ut in ómnibus.
Hymnus
Magnæ cohórtis príncipem
Ignátium laus cóncinat,
clarum loquélis, áctibus
ducem ciéntem mílites.
Regi suprémo cælitum
amóre vinctus único,
eius fovénda glória
nil cénsuit iucúndius.
Hinc se suósque dévovet,
urgéntis instar ágminis,
ut iura Christi víndicet,
erróris umbras díssipet.
Sancto monénte Spíritu,
certam salútis sémitam
scrutátor altus sæculis
doctórque prudens dénotat.
Suis alúmnis díssita
missis in orbis lítora,
Ecclésiam quot éxpetit
frondére lætam géntibus!
Ad Laud. mat. de Com. Past. vel Pro Rel.
Ad Benedictus, ant. Utinam possim cognóscere Christum et virtútem resurrectiónis eius et societátem passiónum illíus!
Preces De Communi Pastorum.
Hymnus
Magnæ cohórtis príncipem
Ignátium laus cóncinat,
clarum loquélis, áctibus
ducem ciéntem mílites.
Regi suprémo cælitum
amóre vinctus único,
eius fovénda glória
nil cénsuit iucúndius.
Hinc se suósque dévovet,
urgéntis instar ágminis,
ut iura Christi víndicet,
erróris umbras díssipet.
Sancto monénte Spíritu,
certam salútis sémitam
scrutátor altus sæculis
doctórque prudens dénotat.
Suis alúmnis díssita
missis in orbis lítora,
Ecclésiam quot éxpetit
frondére lætam géntibus!
Ad Magnificat, ant. Quid prodest hómini si mundum univérsum lucrétur, ánimæ vero suæ detriméntum patiátur?
Preces De Communi Pastorum.