NOVEMBER 1

Die 1 novembris

OMNIUM SANCTORUM

Sollemnitas

Ad I Vesperas

Hymnus
        

Psalmodia

Ant. 1 Lux perpétua lucébit sanctis tuis, Dómine, et ætérnitas témporum, allelúia.

Psalmus 112 (113)
    

Laudáte, púeri Dómini,*

laudáte nomen Dómini.

Sit nomen Dómini benedíctum*

ex hoc nunc et usque in sæculum.

A solis ortu usque ad occásum*

laudábile nomen Dómini.

Excélsus super omnes gentes Dóminus,*

super cælos glória eius.

Quis sicut Dóminus Deus noster,
qui in altis hábitat*

et se inclínat, ut respíciat
in cælum et in terram?

Súscitans de terra ínopem,*

de stércore érigens páuperem,

ut cóllocet eum cum princípibus,*

cum princípibus pópuli sui.

Qui habitáre facit stérilem in domo,*

matrem filiórum lætántem.

Ant. Lux perpétua lucébit sanctis tuis, Dómine, et ætérnitas témporum, allelúia.

Ant. 2 Ierúsalem, cívitas Dei, lætáberis in fíliis tuis, quóniam omnes benedicéntur et congregabúntur ad Dóminum, allelúia.

Psalmus 147 (147 B)
    

Lauda, Ierúsalem, Dóminum;*

colláuda Deum tuum, Sion.

Quóniam confortávit seras portárum tuárum,*

benedíxit fíliis tuis in te.

Qui ponit fines tuos pacem*

et ádipe fruménti sátiat te.

Qui emíttit elóquium suum terræ,*

velóciter currit verbum eius.

Qui dat nivem sicut lanam,*

pruínam sicut cínerem spargit.

Mittit crystállum suam sicut buccéllas;*

ante fáciem frígoris eius quis sustinébit?

Emíttet verbum suum et liquefáciet ea,*

flabit spíritus eius, et fluent aquæ.

Qui annúntiat verbum suum Iacob,*

iustítias et iudícia sua Israel.

Non fecit táliter omni natióni,*

et iudícia sua non manifestávit eis.

Ant. Ierúsalem, cívitas Dei, lætáberis in fíliis tuis, quóniam omnes benedicéntur et congregabúntur ad Dóminum, allelúia.

Ant. 3 Cantábant sancti cánticum novum ante sedem Dei et Agni, et resonábat terra in voces illórum, allelúia.

Sequens canticum dicitur cum Allelúia, prouti hic notatur, quando cum cantu profertur; in recitatione vero sufficit ut Allelúia dicatur in initio et fine uniuscuiusque strophæ.

Canticum  Cf. Ap 19, 1-2. 5-7
    

Allelúia.

Salus et glória et virtus Deo nostro,*

(R/. Allelúia.)

quia vera et iusta iudícia eius.

R/. Allelúia (allelúia).

Allelúia.

Laudem dícite Deo nostro, omnes servi eius*

(R/. Allelúia.)

et qui timétis eum, pusílli et magni!

R/. Allelúia (allelúia).

Alléluia.

Quóniam regnávit Dóminus, Deus noster omnípotens.*

(R/. Allelúia.)

Gaudeámus et exsultémus et demus glóriam ei.

R/. Allelúia (allelúia).

Allelúia.

Quia venérunt núptiæ Agni,*

(R/. Allelúia.)

et uxor eius præparávit se.

R/. Allelúia (allelúia).

Ant. Cantábant sancti cánticum novum ante sedem Dei et Agni, et resonábat terra in voces illórum, allelúia.

Lectio brevis   Hebr 12, 22-24

Accessístis ad Sion montem et civitátem Dei vivéntis, Ierúsalem cæléstem, et multa mília angelórum, frequéntiam et ecclésiam primogenitórum, qui conscrípti sunt in cælis, et iúdicem Deum ómnium, et spíritus iustórum, qui consummáti sunt, et testaménti novi mediatórem Iesum, et sánguinem aspersiónis, mélius loquéntem quam Abel.

Responsorium breve
R/.
Exsúltent iusti * In conspéctu Dei. Exsúltent.
V/. Et delecténtur in lætítia. * In conspéctu Dei. Glória Patri. Exsúltent.

Ad Magnificat, ant. Te gloriósus Apostolórum chorus, te prophetárum laudábilis númerus, te mártyrum candidátus laudat exércitus, te omnes sancti et elécti voce confiténtur unánimes, beáta Trínitas, unus Deus.

Preces

Deum, corónam sanctórum ómnium, gaudénter deprecémur: Per intercessiónem sanctórum salva nos, Dómine.

Deus sapientíssime, qui Apóstolos per Christum fundaméntum Ecclésiæ constituísti,
serva fidéles tuos in eórum doctrína.

Qui martýribus fortitúdinem testimónii usque ad effusiónem sánguinis dedísti,
redde christiános testes fidéles Fílii tui.

Qui sanctis virgínibus donum insígne dedísti Christum vírginem imitándi,
iísdem concéde, ut virginitátem tibi consecrátam peculiáre signum cæléstium bonórum agnóscant.

Qui in sanctis ómnibus præséntiam, vultum et verbum tuum maniféstas,
tríbue fidélibus ut, eos coléndo, tibi propinquióres se esse séntiant.

Defúnctis concéde, ut cum beáta María Vírgine, beáto Ioseph et ómnibus sanctis perénniter hábitent,
atque per intercessiónem eórum idem cæléste consórtium nobis largíre.

Pater noster.

Oratio

Omnípotens sempitérne Deus, qui nos ómnium sanctórum tuórum mérita sub una tribuísti celebritáte venerári, quæsumus, ut desiderátam nobis tuæ propitiatiónis abundántiam, multiplicátis intercessóribus, largiáris. Per Dóminum.

Ad Invitatorium

Aperi, Dómine

V/. Dómine, lábia.

Ant. Deum, qui glorificátur in concílio sanctórum, veníte, adorémus.

Veníte, exsultémus vel Iubiláte Dómino vel Deus misereátur nostri vel Dómini est terra.

Ad Officium lectionis

Hymnus

Psalmodia

Ant. 1 Admirábile est nomen tuum, Dómine, quia glória et honóre coronásti sanctos tuos et constituísti eos super ópera mánuum tuárum.

Psalmus 8
    

Dómine, Dóminus noster,*

quam admirábile est nomen tuum
in univérsa terra,

quóniam eleváta est magnificéntia tua*

super cælos.

Ex ore infántium et lactántium†

perfecísti laudem propter inimícos tuos,*

ut déstruas inimícum et ultórem.

Quando vídeo cælos tuos, ópera digitórum tuórum,*

lunam et stellas, quæ tu fundásti,

quid est homo, quod memor es eius,*

aut fílius hóminis quóniam vísitas eum?

Minuísti eum paulo minus ab ángelis,†

glória et honóre coronásti eum*

et constituísti eum super ópera mánuum tuárum.

Omnia subiecísti sub pédibus eius,†

oves et boves univérsas,*

ínsuper et pécora campi,

vólucres cæli et pisces maris,*

quæcúmque perámbulant sémitas maris.

Dómine, Dóminus noster,*

quam admirábile est nomen tuum
in univérsa terra!

Ant. Admirábile est nomen tuum, Dómine, quia glória et honóre coronásti sanctos tuos et constituísti eos super ópera mánuum tuárum.

Ant. 2 Beáti mundo corde, quóniam ipsi Deum vidébunt.

Psalmus 14 (15)
    

Dómine, quis habitábit in tabernáculo tuo?*

Quis requiéscet in monte sancto tuo?

Qui ingréditur sine mácula et operátur iustítiam,*

qui lóquitur veritátem in corde suo,

qui non egit dolum in lingua sua,†

nec fecit próximo suo malum*

et oppróbrium non íntulit próximo suo.

Ad níhilum reputátus est in conspéctu eius
malígnus,*

timéntes autem Dóminum gloríficat.

Qui iurávit in detriméntum suum et non mutat,†

qui pecúniam suam non dedit ad usúram*

et múnera super innocéntem non accépit.

Qui facit hæc,*

non movébitur in ætérnum.

Ant. Beáti mundo corde, quóniam ipsi Deum vidébunt.

Ant. 3 Sanctis tuis notas fecísti vias vitæ; adimplébis eos lætítia cum vultu tuo, Dómine.

Psalmus 15 (16)
    

Consérva me, Deus,*

quóniam sperávi in te.

Dixi Dómino: «Dóminus meus es tu,*

bonum mihi non est sine te».

In sanctos, qui sunt in terra, ínclitos viros,*

omnis volúntas mea in eos.

Multiplicántur dolóres eórum,*

qui post deos aliénos acceleravérunt.

Non effúndam libatiónes eórum de sanguínibus,*

neque assúmam nómina eórum in lábiis meis.

Dóminus pars hereditátis meæ et cálicis mei:*

tu es qui détines sortem meam.

Funes cecidérunt mihi in præcláris;*

ínsuper et heréditas mea speciósa est mihi.

Benedícam Dóminum,
qui tríbuit mihi intelléctum;*

ínsuper et in nóctibus erudiérunt me renes mei.

Proponébam Dóminum in conspéctu meo semper;*

quóniam a dextris est mihi non commovébor.

Propter hoc lætátum est cor meum,†

et exsultavérunt præcórdia mea;*

ínsuper et caro mea requiéscet in spe.

Quóniam non derelínques ánimam meam
in inférno,*

nec dabis sanctum tuum vidére corruptiónem.

Notas mihi fácies vias vitæ,†

plenitúdinem lætítiæ cum vultu tuo,*

delectatiónes in déxtera tua usque in finem.

Ant. Sanctis tuis notas fecísti vias vitæ; adimplébis eos lætítia cum vultu tuo, Dómine.

V/. Respícite ad Dóminum, et illuminámini.
R/. Et fácies vestræ non confundéntur.

Lectio prior

De libro Apocalýpsis beáti Ioánnis apóstoli 5, 1-14

Redemisti nos Deo ex omni tribu et lingua et populo et natione

Ego Ioánnes vidi in déxtera sedéntis super thronum librum scriptum intus et foris, signátum sigíllis septem. Et vidi ángelum fortem prædicántem voce magna: «Quis est dignus aperíre librum et sólvere signácula eius?». Et nemo póterat in cælo neque in terra neque subtus terram aperíre librum neque respícere illum. Et ego flebam multum quóniam nemo dignus invéntus est aperíre librum nec respícere eum. Et unus de senióribus dicit mihi: «Ne fléveris; ecce vicit leo de tribu Iudæ, radix David, aperíre librum et septem signácula eius».

Et vidi in médio throni et quáttuor animálium et in médio seniórum Agnum stantem tamquam occísum, habéntem córnua septem et óculos septem, qui sunt septem spíritus Dei missi in omnem terram. Et venit et accépit de déxtera sedéntis in throno. Et cum accepísset librum, quáttuor animália et vigínti quáttuor senióres cecidérunt coram Agno, habéntes sínguli cítharas et phíalas áureas plenas incensórum, quæ sunt oratiónes sanctórum. Et cantant novum cánticum dicéntes: «Dignus es accípere librum et aperíre signácula eius, quóniam occísus es et redemísti Deo in sánguine tuo ex omni tribu et lingua et pópulo et natióne et fecísti eos Deo nostro regnum et sacerdótes, et regnábunt super terram».

Et vidi et audívi vocem angelórum multórum in circúitu throni et animálium et seniórum, et erat númerus eórum myríades myríadum et mília mílium dicéntium voce magna: «Dignus est Agnus, qui occísus est, accípere virtútem et divítias et sapiéntiam et fortitúdinem et honórem et glóriam et benedictiónem».

Et omnem creatúram, quæ in cælo est et super terram et sub terram et super mare et quæ in eis ómnia, audívi dicéntes: «Sedénti super thronum et Agno benedíctio et honor et glória et potéstas in sæcula sæculórum».

Et quáttuor animália dicébant: «Amen»; et senióres cecidérunt et adoravérunt.

Responsorium   Ap 11, 17; 1, 4; cf. 11, 18; Ps 144 (145), 10
R/.
Grátias ágimus tibi, Dómine Deus omnípotens, qui es et qui eras et qui ventúrus es, * Quia regnásti et advénit tempus reddéndi mercédem servis tuis et sanctis.
V/. Confiteántur tibi, Dómine, ómnia ópera tua, et sancti tui benedícant tibi. * Quia.

Lectio altera

Ex Sermónibus sancti Bernárdi abbátis (Sermo 2: Opera omnia, Edit. Cisterc. 5 [1968], 364-368)

Properemus ad fratres qui nos exspectant

Ad quid ergo sanctis laus nostra, ad quid glorificátio nostra, ad quid nostra hæc ipsa sollémnitas? Quo eis terrénos honóres, quos iuxta verácem Fílii promissiónem honoríficat Pater cæléstis? Quo eis præcónia nostra? Honórum nostrórum sancti non egent, nec quidquam eis nostra devotióne præstátur. Plane quod eórum memóriam venerámur, nostra ínterest, non ipsórum. Ego in me, fáteor, ex hac recordatióne séntio desidérium véhemens inflammári.

Hoc enim primum desidérium, quod in nobis sanctórum memória vel éxcitat vel íncitat magis, ut eórum tam optábili societáte fruámur et mereámur concíves et contubernáles esse spirítuum beatórum, miscéri cœtui patriarchárum, cúneis prophetárum, senátui Apostolórum, mártyrum exercítibus numerósis, confessórum collégiis, vírginum choris, in ómnium dénique cólligi et collætári communióne sanctórum. Præstolátur nos Ecclésia illa primitivórum, et neglégimus; desíderant nos sancti, et parvi péndimus; exspéctant nos iusti, et dissimulámus.

Excitémur aliquándo, fratres; resurgámus cum Christo, quærámus quæ sursum sunt, quæ sursum sunt sapiámus. Desiderémus desiderántes nos, properémus ad præstolántes nos, exspectántes nos votis præoccupémus animórum. Non modo tantum socíetas, sed étiam felícitas nobis est optánda sanctórum, ut quorum desiderámus præséntiam, glóriam quoque ferventíssimis stúdiis ambiámus. Neque enim perniciósa ambítio hæc, aut illíus affectátio glóriæ ullátenus periculósa est.

Hoc ergo secúndum desidérium, quod ex sanctórum commemoratióne flagrat in nobis, ut sicut illis sic étiam nobis Christus appáreat, vita nostra, et nos quoque cum ipso appareámus in glória. Interim nempe non sicut est, sed sicut pro nobis factum est, caput nostrum nobis repræsentátur, non coronátum glória, sed peccatórum nostrórum circúmdatum spinis. Púdeat sub spináto cápite membrum fíeri delicátum, quod omnis ei ínterim púrpura non tam honóris sit quam irrisiónis. Erit cum vénerit Christus, nec mors eius ultra annuntiábitur, ut sciámus quóniam ipsi quoque mórtui sumus, et cum eo abscóndita est vita nostra. Apparébit caput gloriósum, et cum eo membra glorificáta fulgébunt, cum vidélicet reformábit corpus humilitátis nostræ configurátum glóriæ cápitis, quod est ipse.

Hanc ergo glóriam tota et tuta ambitióne concupiscámus. Sane ut eam nobis speráre líceat et ad tantam beatitúdinem aspiráre, summópere nobis desideránda sunt suffrágia quoque sanctórum, ut quod possibílitas nostra non óbtinet, eórum nobis intercessióne donétur.

Responsorium   Ap 19, 5b. 6b; Ps 32 (33), 1
R/.
Laudem dícite Deo nostro, omnes servi eius et qui timétis Deum, pusílli et magni! * Quóniam regnávit Dóminus Deus noster omnípotens.
V/. Exsultáte, iusti, in Dómino; rectos decet collaudátio. * Quóniam.

Hymnus Te Deum.

Oratio

Omnípotens sempitérne Deus, qui nos ómnium sanctórum tuórum mérita sub una tribuísti celebritáte venerári, quæsumus, ut desiderátam nobis tuæ propitiatiónis abundántiam, multiplicátis intercessóribus, largiáris. Per Dóminum.

Ad Laudes matutinas

Hymnus

Ant. 1 In cæléstibus regnis sanctórum habitátio est, et in ætérnum réquies eórum, allelúia.

Psalmus de dominica hebd. I.

Ant. 2 Sancti Dómini, Dóminum benedícite in ætérnum.

Canticum de dominica hebd. I.

Ant. 3 Hymnus ómnibus sanctis eius, fíliis Israel, pópulo appropinquánti sibi; glória hæc est ómnibus sanctis eius.

Psalmus de dominica hebd. I.

Lectio brevis   Eph 1, 17-18

Deus Dómini nostri Iesu Christi, Pater glóriæ det vobis Spíritum sapiéntiæ et revelatiónis in agnitióne eius, illuminátos óculos cordis vestri, ut sciátis quæ sit spes vocatiónis eius, quæ divítiæ glóriæ hereditátis eius in sanctis.

Responsorium breve
R/.
Lætámini in Dómino, * Et exsultáte, iusti. Lætámini.
V/. Et gloriámini, omnes recti corde. * Et exsultáte, iusti. Glória Patri. Lætámini.

Ad Benedictus, ant. Iusti fulgébunt sicut sol in regno Patris eórum, allelúia.

Preces

Deum, corónam sanctórum ómnium, gaudénter deprecémur: Per intercessiónem sanctórum salva nos, Dómine.

Deus, fons sanctitátis, qui multifórmis grátiæ tuæ mirabília in sanctis fulgére fecísti,
concéde nobis in illis magnitúdinem tuam celebráre.

Providentíssime ætérne Deus, qui perfectióres Fílii tui imágines in sanctis nobis ostendísti,
præsta, ut ad uniónem cum Christo per illos efficácius moveámur.

Rex cælórum, qui per fidéles Christi sectatóres ad futúram civitátem nos íncitas,
fac ut ab illis de tutióre via illuc perveniéndi edoceámur.

Deus, qui in sacrifício córporis Fílii tui árctius cæléstibus íncolis nos coniúngis,
auge devotiónem nostram, ut cúltui eórum perféctius conformémur.

Pater noster.

Oratio

Omnípotens sempitérne Deus, qui nos ómnium sanctórum tuórum mérita sub una tribuísti celebritáte venerári, quæsumus, ut desiderátam nobis tuæ propitiatiónis abundántiam, multiplicátis intercessóribus, largiáris. Per Dóminum.

Ad Horam mediam

Ad Tertiam (Sextam, Nonam)

Hymnus Nunc, Sancte, nobis vel Certum tenéntes

Ant. Consolábitur Dóminus Sion; gáudium et lætítia inveniétur in ea, gratiárum áctio et vox laudis.

Psalmi graduales Series I. Si vero occurrat dominica, dicuntur psalmi de dominica hebd. I (Psalmus 117 (118)
    
).

Lectio brevis   Is 65, 18-19

Gaudébunt et exsultábunt usque in sempitérnum in his, quæ ego creo, quia ecce ego creo Ierúsalem exsultatiónem et pópulum eius gáudium. Et exsultábo in Ierúsalem et gaudébo in pópulo meo, et non audiétur in ea ultra vox fletus et vox clamóris.

V/. Gaudéte et exsultáte, omnes sancti.
R/. Quóniam merces vestra copiósa est in cælis.

Oratio

Ad Sextam

Hymnus Rector potens vel Dicámus laudes

Ant. Sapiéntiam sanctórum narrant pópuli, et laudem eórum pronúntiat omnis Ecclésia.

Psalmi graduales Series II. Si vero occurrat dominica, dicuntur psalmide dominica hebd. I (Psalmus 117 (118)
    
).

Lectio brevis   1 Petr 1, 15-16

Secúndum eum, qui vocávit vos, sanctum, et ipsi sancti in omni conversatióne sitis, quóniam scriptum est: Sancti éritis, quia ego sanctus sum.

V/. Lætámini, iusti, in Dómino.
R/. Et confitémini memóriæ sanctitátis eius.

Oratio

Ad Nonam

Hymnus Rerum, Deus vel Ternis horárum

Ant. Sancti per fidem vicérunt regna, operáti sunt iustítiam, adépti sunt promissiónes.

Psalmi graduales Series III. Si vero occurrat dominica, dicuntur psalmide dominica hebd. I (Psalmus 117 (118)
    
).

Lectio brevis   Ap 21, 10-11a; 22, 3b-4

Angelus sústulit me in spíritu super montem magnum et altum et osténdit mihi civitátem sanctam Ierúsalem descendéntem de cælo a Deo, habéntem claritátem Dei. Et thronus Dei et Agni in illa erit; et servi eius sérvient illi et vidébunt fáciem eius, et nomen eius in fróntibus eórum.

V/. Iusti confitebúntur nómini tuo, Dómine.
R/. Et habitábunt recti in conspéctu tuo.

Oratio

Omnípotens sempitérne Deus, qui nos ómnium sanctórum tuórum mérita sub una tribuísti celebritáte venerári, quæsumus, ut desiderátam nobis tuæ propitiatiónis abundántiam, multiplicátis intercessóribus, largiáris. Per Christum.

Ad II Vesperas

Hymnus
        

Ant. 1 Vidi turbam magnam quam dinumeráre nemo póterat, ex ómnibus géntibus, stantes ante thronum.

Psalmus 109 (110), 1-5. 7
    

Dixit Dóminus Dómino meo:*

«Sede a dextris meis,

donec ponam inimícos tuos*

scabéllum pedum tuórum».

Virgam poténtiæ tuæ emíttet Dóminus ex Sion:*

domináre in médio inimicórum tuórum.

Tecum principátus in die virtútis tuæ,†

in splendóribus sanctis,*

ex útero ante lucíferum génui te.

Iurávit Dóminus et non pænitébit eum:*

«Tu es sacérdos in ætérnum
secúndum órdinem Melchísedech».

Dóminus a dextris tuis,*

conquassábit in die iræ suæ reges.

De torrénte in via bibet,*

proptérea exaltábit caput.

Ant. Vidi turbam magnam, quam dinumeráre nemo póterat, ex ómnibus géntibus, stantes ante thronum.

Ant. 2 Deus tentávit illos et invénit eos dignos se; ídeo accípient regnum decóris de manu Dómini.

Psalmus 115 (116 B)
    

Crédidi, étiam cum locútus sum:*

«Ego humiliátus sum nimis».

Ego dixi in trepidatióne mea:*

«Omnis homo mendax».

Quid retríbuam Dómino*

pro ómnibus, quæ retríbuit mihi?

Cálicem salutáris accípiam*

et nomen Dómini invocábo.

Vota mea Dómino reddam*

coram omni pópulo eius.

Pretiósa in conspéctu Dómini*

mors sanctórum eius.

O Dómine, ego servus tuus,*

ego servus tuus et fílius ancíllæ tuæ.

Dirupísti víncula mea:†

tibi sacrificábo hóstiam laudis*

et nomen Dómini invocábo.

Vota mea Dómino reddam*

coram omni pópulo eius,

in átriis domus Dómini,*

in médio tui, Ierúsalem.

Ant. Deus tentávit illos et invénit eos dignos se; ídeo accípient regnum decóris de manu Dómini.

Ant. 3 Redemísti nos, Dómine Deus, in sánguine tuo ex omni tribu et lingua et pópulo et natióne, et fecísti nos Deo nostro regnum.

Canticum  Ap 4, 11; 5, 9. 10. 12
    

Dignus es, Dómine et Deus noster,*

accípere glóriam et honórem et virtútem,

quia tu creásti ómnia,*

et propter voluntátem tuam
erant et creáta sunt.

Dignus es, Dómine, accípere librum*

et aperíre signácula eius,

quóniam occísus es†

et redemísti Deo in sánguine tuo*

ex omni tribu et lingua et pópulo et natióne

et fecísti eos Deo nostro regnum et sacerdótes,*

et regnábunt super terram.

Dignus est Agnus, qui occísus est,†

accípere virtútem et divítias et sapiéntiam*

et fortitúdinem et honórem
et glóriam et benedictiónem.

Ant. Redemísti nos, Dómine Deus, in sánguine tuo ex omni tribu et lingua et pópulo et natióne, et fecísti nos Deo nostro regnum.

Lectio brevis   Cor 6, 16b; 7, 1

Vos enim estis templum Dei vivi; sicut dicit Deus: Inhabitábo in illis et inambulábo et ero illórum Deus, et ipsi erunt mihi pópulus. Has ígitur habéntes promissiónes, caríssimi, mundémus nos ab omni inquinaménto carnis et spíritus, perficiéntes sanctificatiónem in timóre Dei.

Responsorium breve
R/.
Sancti et iusti, * In Dómino gaudéte. Sancti.
V/. Vos elégit Deus in hereditátem sibi. * In Dómino gaudéte. Glória Patri. Sancti.

Ad Magnificat, ant. O quam gloriósum est regnum, in quo cum Christo gaudent omnes sancti; amícti stolis albis sequúntur Agnum quocúmque íerit.

Preces

Deum, corónam sanctórum ómnium, gaudénter deprecémur: Per intercessiónem sanctórum salva nos, Dómine.

Deus sapientíssime, qui Apóstolos per Christum fundaméntum Ecclésiæ constituísti,
serva fidéles tuos in eórum doctrína.

Qui martýribus fortitúdinem testimónii usque ad effusiónem sánguinis dedísti,
redde christiános testes fidéles Fílii tui.

Qui sanctis virgínibus donum insígne dedísti Christum vírginem imitándi,
iísdem concéde, ut virginitátem tibi consecrátam peculiáre signum cæléstium bonórum agnóscant.

Qui in sanctis ómnibus præséntiam, vultum et verbum tuum maniféstas,
tríbue fidélibus ut, eos coléndo, tibi propinquióres se esse séntiant.

Defúnctis concéde, ut cum beáta María Vírgine, beáto Ioseph et ómnibus sanctis perénniter hábitent,
atque per intercessiónem eórum idem cæléste consórtium nobis largíre.

Pater noster.

Oratio

Omnípotens sempitérne Deus, qui nos ómnium sanctórum tuórum mérita sub una tribuísti celebritáte venerári, quæsumus, ut desiderátam nobis tuæ propitiatiónis abundántiam, multiplicátis intercessóribus, largiáris. Per Dóminum.