zcomplem nonam2

PSALMODIA COMPLEMENTARIS

Series III (Ad Nonam)

Psalmus 125 (126)
    
Gaudium et spes in Deo

In converténdo Dóminus captivitátem Sion,*

facti sumus quasi somniántes.

Tunc replétum est gáudio os nostrum,*

et lingua nostra exsultatióne.

Tunc dicébant inter gentes:*

«Magnificávit Dóminus fácere cum eis».

Magnificávit Dóminus fácere nobíscum;*

facti sumus lætántes.

Convérte, Dómine, captivitátem nostram,*

sicut torréntes in austro.

Qui séminant in lácrimis,*

in exsultatióne metent.

Eúntes ibant et flebant*

semen spargéndum portántes;

veniéntes autem vénient in exsultatióne*

portántes manípulos suos.

Psalmus 130 (131)
    

Quasi parvuli fiducia in Domino collocata

Dómine, non est exaltátum cor meum,*

neque eláti sunt óculi mei;

neque ambulávi in magnis,*

neque in mirabílibus super me.

Vere pacátam et quiétam*

feci ánimam meam;

sicut ablactátus in sinu matris suæ,*

sicut ablactátus, ita in me est ánima mea.

Speret Israel in Dómino*

ex hoc nunc et usque in sæculum.

Psalmus 127 (128)
Pax domestica in Domino

Beátus omnis, qui timet Dóminum,*

qui ámbulat in viis eius.

Labóres mánuum tuárum manducábis,*

beátus es, et bene tibi erit.

Uxor tua sicut vitis fructífera*

in latéribus domus tuæ;

fílii tui sicut novéllæ olivárum*

in circúitu mensæ tuæ.

Ecce sic benedicétur homo,*

qui timet Dóminum.

Benedícat tibi Dóminus ex Sion,*

et vídeas bona Ierúsalem
ómnibus diébus vitæ tuæ;

et vídeas fílios filiórum tuórum.*

Pax super Israel!